ਜਵਾਨ ਫਿਲਮ ਦੇ ਕੁਝ ਹਿੱਸੇ ਆਨਲਾਈਨ ਲੀਕ ਹੋਏ
ਬਾਲੀਵੁੱਡ ਦੇ ਮਸ਼ਹੂਰ ਅਭਿਨੇਤਾ ਸ਼ਾਹਰੁਖ ਖਾਨ ਦੀ ਫਿਲਮ ‘ਜਵਾਨ’ ਜਿਸ ਦਾ ਇਸ ਸਾਲ ਲੋਕਾਂ ਨੂੰ ਬਹੁਤ ਹੀ ਜਿਆਦਾ ਇੰਤਜ਼ਾਰ ਹੈ, ਦੇ ਦੀਆਂ ਕੁਝ ਕਲਿਪਾਂ ਆਨਲਾਈਨ ਲੀਕ ਹੋਣ ਦੀ ਖਬਰ ਹੈ। ਫਿਲਮ ਜਵਾਨ ਸ਼ਾਹਰੁਖ ਖਾਨ ਦਾ ਇਸ ਸਾਲ ਦਾ ਇਕ ਬਹੁਤ ਵੱਡਾ ਪ੍ਰੋਜੈਕਟ ਹੈ। ਕਲਿਪਾਂ ਲੀਕ ਹੋਣ ਕਾਰਨ ਮੀਡੀਆ ਵਿੱਚ ਕਾਫੀ ਚਰਚਾ ਛਿੜੀ ਹੋਈ ਹੈ। ਸ਼ਾਹਰੁਖ ਖਾਨ ਦੀ ਪ੍ਰੋਡਕਸ਼ਨ ਕੰਪਨੀ ਰੈੱਡ ਚਿਲੀਜ਼ ਐਂਟਰਟੇਨਮੈਂਟ ਅਤੇ ਉਨ੍ਹਾਂ ਦੀ ਪਤਨੀ ਗੌਰੀ ਖਾਨ ਨੇ ਇਸ ’ਤੇ ਕਾਨੂੰਨੀ ਕਾਰਵਾਈ ਕੀਤੀ ਹੈ। ਉਨ੍ਹਾਂ ਨੇ ਕਿਸੇ ਅਜਿਹੇ ਵਿਅਕਤੀ ਵਿਰੁੱਧ ਸ਼ਿਕਾਇਤ ਦਰਜ ਕਰਵਾਈ ਜਿਸ ਨੂੰ ਉਹ ਫਿਲਮ ਤੋਂ ਵੀਡੀਓ ਕਲਿੱਪਾਂ ਨੂੰ ਚੋਰੀ ਕਰਨ ਅਤੇ ਸਾਂਝਾ ਕਰਨ ਲਈ ਜ਼ਿੰਮੇਵਾਰ ਸਮਝਦੇ ਹਨ।
ਫਰੀ ਪ੍ਰੈਸ ਜਰਨਲ ਦੀ ਇੱਕ ਰਿਪੋਰਟ ਦੱਸਦੀ ਹੈ ਕਿ ਅਜਿਹਾ ਕੀ ਹੋਇਆ ਸੀ। ਕੁਝ ਲੋਕਾਂ ਨੇ ‘ਜਵਾਨ’ ਤੋਂ ਬਿਨਾਂ ਇਜਾਜ਼ਤ ਕੁਝ ਵੀਡੀਓ ਕਲਿੱਪ ਲੈ ਲਈਆਂ ਸਨ। ਇਸ ਸਭ ਬਾਰੇ 10 ਅਗਸਤ ਨੂੰ ਮੁੰਬਈ ਦੇ ਇੱਕ ਪੁਲਿਸ ਸਟੇਸ਼ਨ ਵਿੱਚ ਇੱਕ ਅਧਿਕਾਰਤ ਰਿਪੋਰਟ ਦਰਜ ਕਰਵਾਈ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਇਹ ਸੂਚਨਾ ਤਕਨਾਲੋਜੀ ਐਕਟ ਦੇ ਤਹਿਤ ਇੱਕ ਚੋਰੀ ਹੈ।
ਰਿਪੋਰਟ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਚੋਰੀ ਦੀਆਂ ਕਲਿੱਪਾਂ ਨੂੰ ਵੱਖ-ਵੱਖ ਸੋਸ਼ਲ ਮੀਡੀਆ ਸਾਈਟਾਂ ‘ਤੇ ਸਾਂਝਾ ਕੀਤਾ ਗਿਆ ਸੀ। ਪ੍ਰੋਡਕਸ਼ਨ ਕੰਪਨੀ ਨੂੰ ਪਤਾ ਲੱਗਾ ਕਿ ‘ਜਵਾਨ’ ਦੇ ਕੁਝ ਹਿੱਸੇ ਕੁਝ ਟਵਿੱਟਰ ਉਪਭੋਗਤਾਵਾਂ ਦੁਆਰਾ ਆਨਲਾਈਨ ਦਿਖਾਏ ਜਾ ਰਹੇ ਹਨ।
ਇਸ ਦੀ ਜਾਂਚ ਕਰਨ ਤੋਂ ਬਾਅਦ, ਅਧਿਕਾਰੀਆਂ ਨੂੰ ਪੰਜ ਟਵਿੱਟਰ ਅਕਾਉਂਟ ਮਿਲੇ ਜੋ ਲੀਕ ਹੋਏ ਕਲਿੱਪਾਂ ਨੂੰ ਸਾਂਝਾ ਕਰ ਰਹੇ ਸਨ। ਉਨ੍ਹਾਂ ਨੇ ਇਨ੍ਹਾਂ ਖਾਤਿਆਂ ਨੂੰ ਕਾਨੂੰਨੀ ਨੋਟਿਸ ਭੇਜੇ, ਪਰ ਸਿਰਫ ਇਕ ਵਿਅਕਤੀ ਨੇ ਨੋਟਿਸ ਮਿਲਣ ਦੀ ਗੱਲ ਮੰਨੀ।
ਇਸ ਤੋਂ ਪਹਿਲਾਂ ਰੈੱਡ ਚਿਲੀਜ਼ ਐਂਟਰਟੇਨਮੈਂਟ ਲੀਕ ਹੋਏ ਵੀਡੀਓ ਨੂੰ ਲੈ ਕੇ ਦਿੱਲੀ ਹਾਈ ਕੋਰਟ ਜਾ ਕੇ ਕਾਨੂੰਨੀ ਕਾਰਵਾਈ ਕਰ ਚੁੱਕੀ ਹੈ। ਅਦਾਲਤ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਨੂੰ ਕਿਹਾ ਕਿ ‘ਜਵਾਨ’ ਤੋਂ ਸ਼ੇਅਰ ਕੀਤੀਆਂ ਕਲਿੱਪਾਂ ਨੂੰ ਹਟਾ ਦਿੱਤਾ ਜਾਵੇ।
ਫਿਲਮ ਬਣਾਉਣ ਵਾਲੇ ਲੋਕਾਂ ਦੇ ਕਹਿਣ ਮੁਤਾਬਕ ਚੋਰੀ ਹੋਈਆਂ ਵੀਡੀਓ ਕਲਿੱਪਾਂ ਨਾਲ ਫਿਲਮ ਨੂੰ ਮਾਲੀ ਨੁਕਸਾਨ ਪਹੁੰਚਿਆ ਹੈ। ਉਨ੍ਹਾਂ ਦਾ ਇਹ ਵੀ ਕਹਿਣਾ ਹੈ ਕਿ ਇਸ ਨਾਲ ਕਾਪੀਰਾਈਟ ਐਕਟ ਦੀ ਉਲੰਘਣਾ ਹੁੰਦੀ ਹੈ। ਇਸ ਕਾਰਨ ਪੁਲਿਸ ਨੇ ਭਾਰਤੀ ਦੰਡਾਵਲੀ ਦੀ ਧਾਰਾ 379 (ਜੋ ਕਿ ਚੋਰੀ ਬਾਰੇ ਹੈ) ਅਤੇ ਸੂਚਨਾ ਤਕਨਾਲੋਜੀ ਐਕਟ ਦੀ ਧਾਰਾ 43ਬੀ (ਜੋ ਬਿਨਾਂ ਇਜਾਜ਼ਤ ਤੋਂ ਡਾਟਾ ਸਾਂਝਾ ਕਰਨ ਬਾਰੇ ਹੈ) ਤਹਿਤ ਕੇਸ ਦਰਜ ਕੀਤਾ ਹੈ।